Lo llibre dels poetas/Arnau lo Catalá

ARNAU LO CATALÁ

Ben volgra s' ésser pogués
tot lo mal qu' ai fag desfar
e 'l ben que non ai fag far,
qu' enaissí 'm fora ben pres
se 'l bes fos mals e 'l mals bes,
ia pueis no 'm calgra duptar
ans fora le bes tan grans
qu' en fora pars d' on dels sans
era non sai com s' anera de me
tan son li mal gran e petit li be.

Tan mi sen ver Dieu mesprés
que 'm cuidei desesperar;
mas vei qu' eu non o dei far
quar máiers es sa mercés
que 'l mieus grans peccat non es.
Aissó 'm fai assegurar
pero ben voilgr' atrestans
viure e de iorns e de ans
a sa honor per meill trober mercé
com ll' ai estat fals e de mala fe.

Verais Jesucrist, no 'us pes
s' ieu vos ans de ren pregar;
mercés non laissés cobrar
al diabol que tenc pres;
e s' anc sire qu' iñ plagués

al cor vendatz tot car:
le cors qu' a fach los enjans
suefra las penas e 'ls dans;
el cors n' aia pena que il cové
qu' el n' a trait vos e s' arma e se.

Ben sai, si ia 'm val mercés,
que mercés será ses par
sol aiçó 'm deu esglaiar
quan re plus fag non agés;
mas las semanas e 'ls mes
e 'ls ans qu' ai laissat passar
qu' ieu non fai Dieu remenbrans
sol aissó 'm deu ésser dans,
quar gizardon no fei hom de no re
e quier l' a tort qui non á fag de que.

Ben sai qu' a tart mi sui pres
vas Dieu de mercé clamar,
mas el nos mandet so 'm par
que qual c' ora qu' ieu vengués
no 'm soanería ges
e fora tems d' albergar,
pero ben volgra enans laissar
mos faillimens grans
quar en sa cort no pot intrar so cre
nulls homs tachat de nulla mala re.

Les segles fals e truans
vils e semhaires d' enjans
ab hú non a nullhs hom honor ni be
pus ama Dieu ni 'l blan, ni 'l tem, ni 'l cre.

ALTRAS OBRAS D' EST POETA,

I. Dieus verais a vos mi ren,

II. Be n' es razós qu' eu retraya.